ERADA
REVISTA D’HISTORIA CONTEMPORÁNEA D’ASTURIES
EDICIONES TRABE vien de publicar la primer revista que de manera monográfica recueye y divulga estudios d’investigación centraos na dómina contemporánea de la nuestra comunidá.
Acullá de cubrir un vaciu editorial, esta publicación tien la fin de facer llegar a la población asturiana trabayos que d’otra manera nun saldríen fuera de les paredes de la Universidá d’Uviéu. Dende les páxines d’ERADA va facese por dar pasu a nuevos investigadores mesmo que por potenciar y afalar l’estudiu de la nuestra historia.
A la contra d’otres publicaciones hermétiques, ERADA nun va desenvolver censures nin ideolóxiques nin llingüístiques, abriendo les sos páxines a tolos investigadores que cumplan unos mínimos de rigorosidá metodolóxica, penriba que faigan parte de la oficialidá académica o non y de la tenencia historiográfica que sigan.
El primer númberu pue entendese como una muestra plural de lo que se quier con esta revista. Nél recuéyense artículos sobre’l 25 de Mayu del 1808, tocante’l republicanismu decimonónicu o respecto de distintes maneres de resistencia nel ámbitu del trabayu demientres del Franquismu, recúperense documentos históricos y inclúinse reseñes crítiques sobre distintos llibros venceyaos a la temática de la revista: la historia contemporánea d’Asturies.
